قصيدة الزاير

(الحربة)

سْعداتِي بيك يا الزَّايْر رسمِي ما بِينَّا خصَامْ
حَاشا نبدَاك بْالملامْ
لكريم طْبيعتُو يسامح كالشهدَة فايضَة رحِيقْ

القسم 1

مْنْ غِيرك يا وْكيل يشفِي طعن المْلسوع بالنِّيامْ
قلبُو مْدمي بلا سهامْ
وتفاجي ذْ الاضرار عنُّو وتريح عضاه يا شْفيقْ

تْلقي بين المهَاج عطفَة بمحبّة تابعة خصَامْ
جفوَة من بعدها وْئامْ
لقلُوب حوالها تخالف تْنسي بْفراحهَا الضيقْ

وَانا يا سيدي الجافي بعد الهجرَان طال عَامْ
اعطفْ لمراسْمِي ورَامْ
جَاني بنسايمُو يداوِي من ذَاتِي ليعةْ الحريقْ

جاني بْسماحتُو يْواصلْ ونزاحت رِيبة الوهامْ
وْحياتْ مْواثقْ الغرَامْ
والگلسة رايقة ضْرافة والمنطق راقي رقِيقْ

(الحربة)

سْعداتِي بيك يا الزَّايْر رسمِي ما بِينَّا خصَامْ
حَاشا نبدَاك بْالملامْ
لكريم طْبيعتُو يسامح كالشهدَة فايضَة رحِيقْ

القسم2

شْملالِي رافْ بالزيارَة
مشتاق يْطَارح الاشوَاقْ

قاصدْ ركحِي بلا جهارَة
جافلْ من ضِيقة الوثَاقْ

والبسمة زادتُو نْضارَة
باح غرامُو من الرّْماق

وْ ارماقُو طالبة سماحَة تحكِي فسكاتها كلامْ
بالحشمَة زايدَة مقام
نيران دواخلو شعيلة تگدي فدواخلي حريقْ

سعداتي بيها زيارة فغرُوب العيد يا سلامْ
واليقضة عشتْهَا ٱحلام
طاوع قلبُو وجاي قاصد والدّمعة سابقة شهِيقْ

وْهداني بالرضا وريدَة سعدي بخصايل الكرام
منسُومة عابقة غرامْ
بادرت زيارتو مرحّب والكاس يجاورُو ابريق

انخاب معشّْقَة فْراحْةْ لْندِيم مسَاريَة تْوامْ
زُوج على زُوج يا سلَامْ
الشفة لاهجة وْناسَة والمبسم بالصفا طليقْ

(الحربة)

سْعداتِي بيك يا الزَّايْر رسمِي ما بِينَّا خصَامْ
حَاشا نبدَاك بْالملامْ
لكريم طْبيعتُو يسامح كالشهدَة فايضَة رحِيقْ

القسم3

وهلالي تْمّْ عاد دَارَة
يْضوي لي حلكة الغسَاقْ

ٱنْغدّْر لِيه بالحزارَة
ونذُوق انا منِين ذَاقْ

نْتسَارَا بين هاكْ وَارَا
ونْفاجي لِيعة الاعماق

ٱبْهِيمْ على قفاهْ لَاح ثيوتو قطعَة من الظلامْ
خصلات لطاف كالنسامْ
وانا ما بِينها موضّْر نْرجَى فْسوَادهَا طرِيقْ

لولا غرَّة منورة كنّْ بدر يْنبَا على علامْ
أو ضِيّْ الخد حين زامْ
لو راني تْهتْ في غياهب الهوى وضياعي حقيقْ

يمشي ويجي على بساطي برشيق القد والقوامْ
يتمايل ميلة الحمامْ
نخوة ومواتية عطوفو كن ريم فصورتو رشيقْ

والصوت رخيم يا سيادي عصفُور تخارجو انغامْ
على دُوحاتي زهى وحَامْ
غرقتْ روحي فكاس الهوى كالنحلة غرها رحيقْ

(الحربة)

سْعداتِي بيك يا الزَّايْر رسمِي ما بِينَّا خصَامْ
حَاشا نبدَاك بْالملامْ
لكريم طْبيعتُو يسامح كالشهدَة فايضَة رحِيقْ

القسم4

وعطفْ لي شاردٔ العذارَى
ورخفْ مجدُولة النّْطاقْ

وْعطُوفُو عابقَة بْزَارَا
وبخُور فقبّْة الرّْواقْ

وانا جوّال فالمنارَة
ننفحْ من عابق الاحباقْ

وسلينا فالغرام ساعة والعطفة مالها لجام
ما خضنا فالهوى حرام
سيوى قلبين عاشق يزيل بريقو ضيقة العشيقْ

ما هتكنا لْلحجابْ سْترة وكذاك لحرمة الختامْ
فالعفة خْلفْة الكرامْ
نرجَى من خالقي سماحَة ويقيني ساعة الحريقْ

ساعة الفراق يا سيادي نور عياني ضحى اغتام
تمنيناها تكون عامْ
والخاطر بعد كان زاهي خِيّْم فدواخلُو الضيقْ

ودّْعني والصواب لازم والضّْم يتابع السلامْ
لا يمحِي ليعة السقامْ
إلَّا ميعاد للزيارة ميقاتُو زاگِي وثيقْ

(الحربة)

سْعداتِي بيك يا الزَّايْر رسمِي ما بِينَّا خصَامْ
حَاشا نبدَاك بْالملامْ
لكريم طْبيعتُو يسامح كالشهدَة فايضَة رحِيقْ

القسم5
مْصوابْ وْزانتُو طمَارَة
والغْنْجْ يناسْبْ السِّياقْ

وعيونو نايمَة سْكارَى
دْمْعة الفراقْ ف الاحدَاقْ

غِيّْبْ عن شوفتِي تْوارَى
وخيالُو تاه فْ الزّْقاقْ

وْبقَات وْرِيدتُو يْشارَة
وْبقيتْ مْلازم الشّْواقْ

نْترقبْ ساعة الزيارَة
وْنداري حُرقتْ الفراقْ

يا لَايمْ فالخيالْ ناظمْ يغزلْ فقصايدُو نظَامْ
فالعذرِي عالي مقامْ
والبهجة شاهدة بظرفُو والخْفَّة بيه ما تليقْ

جيت انا بالحيا مسلم لا ناتي زلة لقدامْ
خافض طرفي عل الدوامْ
لقبول الله كانراجي فخلاگِي ماني صفيقْ

يا هل التسليم والنباهة وشياخ القول والكلام
عدلو بالقسط فلحكام
مانَا إلَّا لبيب ذوقي ماني بفهامتي نعيقْ

عبد اللَّطيفْ في حضْرة البهجة رقَّاقْ ف الكلامْ
وْ سمُو مْرگُوم كنْ وشامْ
خوسي المجانب السّْقارة والحرف ملازمُو رفِيقْ

والصلاة واجبة فحقُّو محمد خيرة الأنامْ
ونثنِّي ليه بالسلامْ
صدق بالله والرسالة بالأمة حاني شفيقْ

ـــــــــــــــــــــــــــــ

عبد اللطيف خوسي
2019