قصيدة "الطاجين" الشيخ: قدور بن علي المالكي الحنش

قصيدة "الطاجين"
                          الشيخ: قدور بن علي المالكي الحنش

      بحر السوسي/ المرمة الثلاثية  
الحـربـــة:

يا مَــنْ يَصْغـَـى لقـْـوالـِـي * آسيــدنا * رَشْحُـوا بِـنَا شِي امْهَيّْفِيــنْ وَدَّاوْا الطاجِيـنْ *
* وَلَايَنـِّـي غَنْمِـــي اسْمِيـــنْ *

القسم الأول:

أجِـي نحكِـي لكْ كِـيـفْ صَارْ * لَا تَــامَـنْ فعْــشِيــرْ أوْ جَــارْ
ولا صاحب تنويه * فالزمان اصديقك والثيق به * يدق عليك وتْحل لِهْ * غير إلى كان احبيب * كاتعارفه ما يرضى عيـب * ولا ادرى مذمومة * ولد الحيا وناس الكبرة * ما هو امثيـلْ القـُـوم الفجْرة * جاعوا أوهيفوا بالسكرة * والبرد زادهم والسمرة * خطفوه بالبتر فالكمرة * طاجين دَاللحم ميدوم ومنسوم * غير شافه وبْقى مشلوم * من الدَّاهْ أوُسرقه * عَـرَّاهْ من اغطاته فوقه * واسطاب ابْن الظالم مرْقه * ما خاف شي عليه * إيهرقه ويطيح لِهْ * مضرا ياكل جغديد فيه * حتى تشفاه انجالي * علالي علالي *
ويعـريه الله كـيـف عَـرَّا ذاك الطاجيـن * ولايـنــي  غـنمــي اسميــن *

القسم الثاني:

ارْشَــحْ بــنــا ولــــدْ الزّفـُـوتْ * فالحـين حَضَّرْنا شِـي اكــْفُوتْ
وقـلينا بالبصلة والزيــوت * وشـْوِينا وَكـْلِينا * وُلَا اعْبِينَا * وغْطسْنا فَالزّهُو* بالكرايح والموال * والطعارج * وقـْصايَدنا يْهَيجُوا * من لا في قلبُه اغْرَامْ * والنظرة فوجوهْ الرّْيَامْ * هي تكفي دُونْ الطعَامْ * واللي كـَرْشَاوِي يا كـْرامْ * سَـرَّاقْ اعْشاتْ الناس * لـُو اعْرَفتُه * لو عَزِّيتُه * المهتفة فحياتُه * ونْتـَفـْتْ لـُو اللحيَة مَنْ تبْسَالـُه * اعْلى افْعَاله * قـَلّْ امْثاله * اصنعته شفار أوُ قمَّار* افعيشتُه مَدَى له * والهيف به طايش باله * سَنداف تا يسَندَفْ وَرْشَحْ بنا * وُخَاننا فَعْشَانا * وَقتْ الغفلة والرّْشُوقْ * وبْنَات الشُّوقْ مَنْ كل ذوقْ * كل اغْزِيَّلْ يَزْهَى امْعَ اغْزَاله * تَمَّة لعْشَا امْشاتْ * فالطجين اللي هُــو اعْجِيــبْ * الدَّاهْ مَن هُــو اقـْـرِيبْ * مضرَا فِي فـَـاسْ البَالِي * عَلّالِي عَلَّالِي *
يتقطعُه يديه يــوم لثنيـن اقليـــلْ الديـــن * ولايــنــــي غنمــي اسميـــن *

القسم الثالث:

لو كـَانْ احْصَـلْ ولــدْ الحرامْ * لو كـــان اشهَـــرْتُه بالعْـــلَامْ
الرّْدِيلْ الدّاخَل سُوق الزحَامْ * بَالهِيدُورَة * وَتْعُــودْ ناسْهَا مَخْبُــورَة * فَالـْمْدونْ وَلـْقـْـرَى ودْشورَة * بفعايلـُــه الله إيذلـُّه * وَلا انْظـَـنّْ حَــدّْ إحَملـُه * يَا رَبّْـنَا اتْشَتَّتْ شَمْلـُـــه * وِيتْعَاقـَــبْ وِيتْفـَلـَّسْ وِيــوَلي اهْبِيلْ * خَارَجْ لحْـوَالْ * وُسَنْسْلـَة افـْعُـنـْقـُـه * ونْشوفْ انْوَاجْلـُه اتْغَلـْقـُه * هُــوَّ وَاللي امْعَاهْ غَــلـّْـقـُـوا * يَا رَبِّـي بَالنبي العربي * وُوْلَادُه وَأهـْـل البِـيـتْ * وَجْـبَـلْ عَــرْفـَة وَالعابْدِين * وَالـْقـُطـَابَة لمْجَاهْدِينْ * تَعْطِيهْ لـَبْطلْ فِي يديه أوُ رجليه  وُلمفاصلْ * وِيعُودْ اشفايَة امْفاصَلْ * وَحْدَجْ إيشَلّْ بِهْ حَلقه * حَتى يَعوَاجْ لِيهْ شَدْقه * وَتْجِيهْ البَارْدَة اتْخَرْقه * وَتْزِيدُه هُولْ فِي اصْمِيمْ اصْيَارُه * وَالسَّالمَة اعْلِيهْ اتْسَلـَّمْ * َوالطيحْ لـُو الصَّرَّة * تَجْرَى كـَرْشُه اعْلِيهْ * ابْجَاهْ اشْرِيفْ أوُوَالِي * عَلّالِي عَلّالِي *
مَنْ غَمَّسْ فَعْشَاتْنَا إيطِيحُــوا لِيهْ السَّنِّيـنْ * ولاينـــي غنمــي اسمــيـــن *

القسم الرابع:

طـَاجِـينْـنـا اظـْرِيــفْ اسْــلَاوِي * خَطـْـفـُـه اتْقـُـولْ شِي هَرْكـَاوِي
وَلّا اوْصِيــفْ عبــدْ اكـْنَـاوِي * ابْقـَى اهْـنَـا امْتـَـلـِّي * مَـنْ بُـو هَـيُّـوفْ * عَــامْ لـَغْـــلَا كـَانُـوا فِي بُـوجْلـُودْ * وَهْـلْ لـَمْدِينَة هُـمْ الشّهُــودْ * وَالعَـالـَمْ هُـوَ الله * مَا اعْـرَفنَا مَـنْ أذانَـا * أوُخَاننا فعْشَـانَا * رَبِّي ايْخُـونْ بِهْ افـْجَهْـدُه يَـقـْـلَالْ * طـُـولْ عَمْرُه يَبْقـَى مَهْمَــالْ * مَن اذنُـوبْ الـْحَفـَّاظـَة وَلـْشْـيَـاخْ * هُمَا اللي إيخَرْبُه عَشـُّه * إبْلِـيسْ زَلـْـغْ بِـهْ أوُطـَـرْشُه * هُـمَا اسْبَابْ هَاذ الفَـرْجَـة * هَاذِي اقـْصِيّْـتُــه وَعْجُــوبَــة * هَـــاذِي اغْــرِيبْـتُـه كـُونْ احْـصَـلْ * لـَكِـــنْ اصْنَـعْـتُـــه شَـفـَّارْ وُقـَمَّـارْ * عَـمَّـرْ السَّــارَقْ مَــا يَــرْقـَـى * وُلَا يْـوَلـِّي حَــاجَــة بِيــنْ الرّْجَــالْ * قـُـلـْتْ لـْـنَـاسْ الـْعْـقـُولْ * غَـنِّـي يَـا حَـفـَّاظِـي وُصُـولْ * وَسْــمْ النَّـاظـَـمْ قـَـدُّورْ بَــنْ عْـلِــي * اعْـلـَــى الـْجْـحُـودْ إيشَالْي * علالي علالي *
واسلامي للشياخ قاطبة فاقطار البــرين * ولايـنـــي غَـنـمــي اسمـيــن*